7/12(六)福佬歌謠：陳文山、李靜芳、李靜兒演出

7/12音樂會歌詞：
桃花過渡（車鼓調）
（男）正月人迎尪囉嘿 單身娘仔伊都守空房 嘴吃那檳榔伊都面抹粉 手拿珊瑚伊都等待君
伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
（女）二月立春分囉嘿 無好狗拖伊都提渡船 船頂那食飯伊都船底睏 水鬼拖去伊都無神魂
伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
（男）三月是清明囉嘿 風流查某伊都假正經 阿伯那宛然伊都楊宗保 桃花可比伊都穆桂英
伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
（女）四月是春天囉嘿 無好狗拖伊都守港邊 一日那三當伊都無米煮 也敢對阮伊都糕糕纏
伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
（男）五月龍船鬚囉嘿 桃花生美伊都愛風 手舉那雨傘伊都綴人走 愛著緣投伊都無尾鰡
伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
（女）六月人收冬囉嘿 無好狗拖伊都提渡人 衫褲那穿破伊都無人補
穿到出汁伊都遂生蟲 伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
（男）七月樹落葉囉嘿 娶著桃花伊都滿身搖 厝邊那頭尾伊都人愛笑 可比鋤頭伊都掘著石
伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
（女）八月是白露囉嘿 無好狗拖伊都提橫渡 要食那不做伊都叫艱苦 船杯打斷伊都面著烏
伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
（男）九月紅柿紅囉嘿 桃花生美伊都割吊人 割吊那阿伯伊都無要緊 割著少年伊都先不通
伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
（女）十月十月燒囉嘿 阿伯憨想伊都阮昧著 日時那貧憚伊都無人叫 瞑時無某伊都睏破蓆
伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
（男）十一月是冬節囉嘿 大腳查某伊都假小蹄 八寸那鞋面伊都九寸底 恰大阿伯伊都的船杯
伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
（女）十二月是年終囉嘿 摏米做粿伊都敬祖公 有尪那有婿伊都人塊爽 阿伯你著伊都誅冬風
伊都咳呀囉的咳 嘿呀囉的嘿 嘿呀囉的嘿呀伊都咳呀囉的咳
牛犁歌（許丙丁／詞、台灣民謠）
頭戴那竹笠仔喂 遮日頭啊喂 手牽那犁兄仔喂 行到水田頭 那哎唷啊犁兄仔喂 日曝汗那流　大家來合力啊喂 來打拼哎唷喂 那哎唷啊哩嘟犁兄仔喂 日曝汗那流　大家來打拼哎唷喂
腳踏那水車仔喂 在水門啊喂　手牽那犁妹仔喂 透早天未光 那哎唷啊犁妹仔喂 水冷透心腸　 大家來合力啊喂 來打拼哎唷喂 那哎唷啊哩嘟犁妹仔喂 水冷透心腸　大家來打拼哎唷喂
手推著牛犁仔喂 來犁田阿喂　我勸著犁兄仔喂　不通叫艱苦 那噯唷仔犁兄仔喂　為著顧三丈　大家著合力呀喂　來打拼噯唷喂 那哎唷啊哩嘟犁妹仔喂　為著顧三丈　大家來打拼愛唷喂

留傘調（大補甕）
陳三夯傘要起身咿…　留傘隨後面咿…
請問三哥咿啊囉咿　　我問三哥啥原因
你就啊對我啊　　　　對我來說分明咿…哪唉喲底喲
落花有意心堅定咿…　流水卻對我無情咿…
我再為奴咿啊囉咿　　我再為奴有何用
看破啊回鄉啊　　　　回鄉另娶親咿…哪唉喲底喲

病子歌
（男）正月算來囉，桃花開。（女）娘今病囝伊都無人知。
（男）君今問娘囉，愛食啥麼。（女）愛食嘻囉山東香水梨。
（男）卜食我來去買，（女）啊你買予來我食，（男）哎喲俺某喂。（女）哎喲哇君啊喂

（男）二月算來囉，田草青。（女）娘今病囝伊都面啊青青。
（男）君今問娘囉，愛食啥麼。（女）愛食嘻囉枝尾桃仔青。
（男）愛食我來去買，（女）啊你買予來我食，（男）哎喲俺某喂。（女）哎喲哇君啊喂

（男）三月算來囉，人播田。（女）娘今病囝伊都心啊艱難。
（男）君今問娘囉，愛食啥麼。（女）愛食嘻囉老酒這大矸。
（男）愛食我來去買，（女）啊你買予來我食，（男）哎喲俺某喂。（女）哎喲哇君啊喂

（男）四月算來囉，日頭長。（女）娘今病囝伊都面啊帶黃。
（男）君今問娘囉，愛食啥麼。（女）愛食嘻囉仙草滴白糖。
（男）愛食我來去買，（女）啊你買予來我食，（男）哎喲俺某喂。（女）哎喲哇君啊喂

（男）五月算來囉，人扒船。（女）娘今病囝伊都心啊憂悶
（男）君今問娘囉，愛食啥麼。（女）愛食嘻囉五香雙糕潤。
（男）愛食我來去買，（女）啊你買予來我食，（男）哎喲俺某喂。（女）哎喲哇君啊喂

（男）六月算來囉，熱透天。（女）娘今病囝伊都倚啊床邊。
（男）君今問娘囉，愛食啥麼。（女）愛食嘻囉新出紅荔枝。
（男）愛食我來去買，（女）啊你買予來我食，（男）哎喲俺某喂。（女）哎喲哇君啊喂

（男）七月算來囉，普度開。（女）娘今病囝伊都心啊礙礙。
（男）君今問娘囉，愛食啥麼。（女）愛食嘻囉豬肺炒鳳梨。
（男）愛食我來去買，（女）啊你買予來我食，（男）哎喲俺某喂。（女）哎喲哇君啊喂

（男）八月算來囉，是中秋。（女）娘今病囝伊都面啊憂憂
（男）君今問娘囉，愛食啥麼。（女）愛食嘻囉麻豆文旦柚。
（男）愛食我來去買，（女）啊你買予來我食，（男）哎喲俺某喂。（女）哎喲哇君啊喂

（男）九月算來囉，九葡萄。（女）娘今病囝伊都無啊奈何。
（男）君今問娘囉，愛食啥麼。（女）愛食嘻囉羊肉炒黑棗。
（男）愛食我來去買，（女）啊你買予來我食，（男）哎喲俺某喂。（女）哎喲哇君啊喂

（男）十月算來囉，人收冬。（女）紅嬰落土伊都腹啊內空。
（男）君今問娘囉，愛食啥麼。（女）愛食嘻囉麻油炒雞公。
（男）愛食我來去買，（女）啊你買予來我食，（男）哎喲俺某喂。（女）哎喲哇君啊喂